هيثم عباس: عاطف السماني ظلم نفسه وجمهوره

يرى الشاعر والملحن، هيثم عباس، أن الفنان عاطف السماني صاحب موهبة وصوت في غاية التميّز.

ورفض عباس الاتفاق مع الرأي القائل بأن عاطف فنان مظلوم، إذ يعتقد هيثم أن السماني ظلم نفسه وجمهوره.

ونشر هيثم مقطع فيديو لعاطف وهو يردد أغنية “تمشي وين”، التي كتبها ولحّنها هيثم عباس نفسه.

وكتب مع الفيديو: عاطف السماني مظلوم!، كتير من الناس بيرددوا الكلام دا ويسألوني باستمرار عن غياب عاطف السماني وماحصل اختلفوا اتنين في جمال صوت عاطف وذوقه والتزامه في الغناء من خلال الأغنيات البيقدمها لجماهيره… فالمسألة دي في حد ذاتها بتأكد إنه عاطف فنان مميز ومختلف وكان ممكن يكون ناجح أكتر من كدا بكتير فضلاً عن إنه صاحب تجربة ما هينة بالمرة ولكن كل دا ما بيدفعني أقول إنه عاطف السماني مظلوم ولا بيشير لأنه عنده مشروع شغال عليهو كمطرب طموح.

وأضاف: عاطف السماني من ناحية فنان، فنان للحد البعيد ولكن مسألة ظلمه دي هو الظالم نفسه وظالم جمهوره وساحة فنية كان ممكن يقدم ليها ولنفسه قبليها أكتر من الشيء القدمه بأضعاف.

ووجه هيثم رسالة لعاطف قائلا: رسالتي لعاطف السماني بقول ليهو نحن مؤمنين بأنك فنان شفيف ومطبوع زاملناك وجمعتنا بيك ورش ومشاريع وأغنيات في زمن حلو ومنها الأغنية دي تحديداً “تمشي وين” أنا حبيتها عندك أكتر من روحي وكل ما أمسك (عودي) وأجي أغنيها بتذكر شجنك وحسك العالي بيها وفيها ببطل اغنيها.

واختتم رسالته بالقول: نحن منتظرين رجعتك بقوة واهتمامك بمشروعك هو اهتمام بذاتك وفنك وجمهورك الما هين.